Oppalaš- ja eksámenárvosániid váidin
Dus lea vejolašvuohta váidit buot árvosániid mat bohtet du oahppoduođaštussii dahje gelbbolašvuođaduođaštussii. Áigemearri váidit lea logi beaivve dan rájes go don sáhtát oaidnit árvosániid, dahje livččet galgan oaidnit daid.
Oppalaš árvosániid váidin
Oppalaš árvosátni lea árvosátni man oaččut go gearggat ovttain fágain. Dat boahtá oahppoduođaštussii. Dus lea vejolašvuohta váidit dan movt árvosátni lea biddjon, jus oaivvildat ahte ii leat biddjon rievttes vuođu vuođul ja ahte njuolggadusat mat gusket árvosáni bidjamii eai leat čuvvojuvvon, vrd. § 10-4 til 10-6. Váidináigemearri lea 10 beaivve maŋŋil go leat almmuhuvvon.
Jus váiddát, de fertet vuođuštit váidaga. Oahppoplána gealbomihtut leat vuođđun bidjat oppalaš árvosáni. Don galggat ožžon vejolašvuođa čájehit iežat gelbbolašvuođa máŋgga ládje ja iešguđet ládje. Oppalaš árvosátni galgá muitalit mii du oppalaš gelbbolašvuohta fágas lea loahpas fága oahpahusa. Jus oaččut árvosáni IV (ii árvvoštallojuvvon), galggat ožžon ávrrehusa buori áiggis, vrd. § 10-5. Vuođuštus ferte vuolgit diein namuhuvvon čuoggáin, go don it sáhte váidit ieš dan árvosáni, muhto dan movt dat lea biddjon.
Ovdal go váiddát, berret jearrat fágaoahpaheaddjis vuođuštusa, nu mo čuožžo § 10-3.
Mo dáhpáhuvvá váidinproseassa?
- Go skuvla lea ožžon váidaga oahppis, de dat sáddejuvvon fágaoahpaheaddjái gii galgá vuođuštit árvosáni.
- Jus skuvla ii daga ođđa mearrádusa, de sádde skuvla váidaga Romssa ja Finnmárkku stáhtahálddašeaddjái oktan fágaoahpaheaddji cealkámušain ja rektora cealkámušain áššemeannudeami birra. Jus lea IV de bidjá skuvla várrehusa kopiija mielddusin, vrd. Oahppolága láhkaásahusa §10-4 og 10-5.
- Jus Romssa ja Finnmárkku stáhtahálddašeaddji miehtá du váidagoo. de váidda sáddejuvvo ruovttoluotta skuvlii ođđa árvvoštallamii. Don oaččut kopiija reivves mii manná skuvlii.
- Lea dehálaš mearkkašit ahte váidaga miehtan ii mávsse dan ahte árvosátni automáhtalaččat rievdá. Skuvlla ođđa meannudeapmi sáhttá dahkat ahte árvosátni bissu nu movt lea, dahje manná bajas dahje vulos. Lea rektor gii loahpasa mearrida. Don it sáhte váidit rektora ođđa mearrádusa.
- Jo1 ja jo2 oahppit: Lea dušše vejolaš váidit oppalaš árvosániid, ii ge jahkebealárvosániid fágain maiguin it leat geargan, omd. lášmmohallamis.
Don sáddet váidaga skoviin man gávnnat Finnmárkku fylkkasuohkana neahttasiiddus. Doppe gávnnat eambbo dieđuid árvosániid váidima birra.
Eksámenárvosániid váidin
Čálálaš eksámenárvosániid váidagiid sáddet VismaInschool/Privatistportalenis 10 beaivve siskkobealde maŋŋil go leat almmuhuvvon. Eksámenárvosániide it oaččo vuođuštusa. Ii-njálmmálaš eksámeniin oaččut árvosánit eksámenbeaivve. Váidináigemearri álgá de eksámenbeaivve.
Jođanisváidima birra
Dihto fágain lea jođanisáigemearri mii mearkkaša ahte lea oaneheabbo áigemearri. Guđe fágain lea jođanisváidin, sáhttá rievdat jagis jahkái. Loga jođanisváidima birra Oahpahusdirektoráhta neahttasiiddus jus áiggut geavahit dán vejolašvuođa.
Váidda mii hilgojuvvo
Jus skuvla hilgu váidaga go boahtá beare maŋŋit, de dat lea mearrádus man sáhtát váidit. Dán mearrádusa váidináigemearri lea golbma vahkku.